JИЛБИЛӰ ТУШТАЖУ

2017 јыл Россия тергеезинде Президенттиҥ јакарузыла Экологияныҥ јылы деп јарлалган. Ого учурлай Оҥдойдыҥ тӧс библиотеказыныҥ балдарла иштеер бӧлӱгинде «Алтын јерис – Алтайыс» деп, солун туштажу ӧткӱрилген. Туштажуда кычыртулу айылчыбыс, аймактыҥ бичик ле ӱлгер сӱӱчилериниҥ «Чедирген» биригӱзиниҥ турчызы, Тохтонова Марина Михайловна ла Оҥдой јурттыҥ школыныҥ 9 «в» класстыҥ балдары ла баш ӱредӱчизи Дубина Айана Геннадьевна туруштылар.

Кире сӧзинде библиотекарь Чекурашева Людмила Школчиновна балдарды кычыртулу айылчыла таныштырып, бичиичи Татьяна Лебедева «Деловой вторник» деп газетте Марина Михайловнаны «Алтайдыҥ алтын јӱреги» деп адаганы, тегиндӱ болбогонын јетирди. Марина Михайловна Кулады јурттыҥ краеведческий музейиниҥ ишчизи. Музейде иштеп баштаганынаҥ узак ӧй ӧтпӧгӧн дӧ болзо, ижи кӧрӱмјилӱ ле једимдӱ. Кӧрӧӧчилер ле айылчылар ончо телекейдеҥ деп айтсас, јастыра болбос. Ол узак јылдарга Боочы јурттыҥ библиотеказында иштеп, кӧп солун туштажулар, кычырыштар ӧткӱрип, анчада ла оогош болчомдорло иштеерин эрчимдӱ башкарган.

Марина Михайловна јилбиркек, чӱмдеечи, бичик сӱӱген балдарды јууп, «Јаш канат» деп ӧмӧлик тӧзӧп, «Кӱлӱмји» деп газет чыгарган. Бу газеттеҥ болчомдордыҥ чӱмдемелдерин, «Эҥ каткымчылу фотојурук» деп конкурс, алтай улустыҥ аттарыныҥ учурын, чӱм- јаҥдарыстыҥ учурлузын темдектеген, уткуулдар, јурттыҥ солундары ла оноҥ до ӧскӧ кӧп — кӧп јӱрӱмиске керектӱ јартамалдар, бичимелдер болгонын канайып сӱӱнбес, кычырбас. Бу газетти ончо аймакла таркадып, аймактыҥ библиотекарьлары ижинде тузаланып, Марина Михайловнага јаан быйанын айдатан.

Бӱгӱнги туштажуныҥ тӧс амадузы экология болгон. Келген балдарга Марина Михайловна ар – бӱткенди тооп, баалап ла сӱӱп билзин, аҥ –кушка килеҥкей, јалакай болор керек, јарашты сезип, кӧрӱп турар деп куучындады. Бойыныҥ јадып турган јурт јерин ару – чек тудар керек, ол тужында тууразынаҥ келген айылчылар, туристтер база сӱрее – чӧбин ары – бери таштабас. Ар – бӱткенге, оны корыырына учурлап бичиген бичимелдериле, ӱлгерлериле таныштырды.

Је анчада ла балдарга таштардыҥ кӧрӱ-выставказы јарады. Бу таштарды Марина Михайловна бойы јууп јат. Кажы ла ташта башка јурук. Бир ташта јаражай кыстыҥ сӱр-кебери, тийиҥниҥ ле о.ӧ. Бастыра ар – бӱткен, ол тоодо таштар тирӱ деген ийдеге келдибис. Бу таштарла Казанда ӧткӧн кӧрӱде Марина Михайловна база турушкан.

Туштажуга келгендер агаш – ташты, аҥ –кушты, ар – бӱткенди артатпай, киртитпей, келер ӱйеге энчи – байлык эдип артыргызар ӱредӱ, таскамал алган деп, иженер керек.

Кыдыева А.Ю., библиотекарь

Источник: Районная газета «Ажуда»