ЈАЙАЛТАЛУ ЈЕРЛЕЖИСЛЕ ЈЫЛУ ЭҤИР-ТУШТАЖУ

Кӱчӱрген айдыҥ 17-чи кӱнинде Оҥдой јурттыҥ культура байзыҥында бистиҥ јерлежистиҥ — јайалталу ӱлгерчи, кӱӱ салаачы, кожоҥчы Андрей Хабаровтыҥ «Ижемји» деп адалган кеендик эҥир-туштажузы кӧдӱриҥилӱ айалгада ӧтти.

Школдо ӱренип турарда, сӧстӧрди тизип баштаган. Андрей Хабаровтыҥ ӱлгерлери јайаандык телекейди байгызат, бойыныҥ солун јаҥылгалу ӱниле аҥыланат. Оныҥ ӱлгерлери јӱрӱм, сӱӱш керегинде, олордыҥ сӱр-кеберлери чокым, јараш, тили ээлгир-јымжак. Кӧп ӱлгерлери кӱӱге салынып, эл-јон ортодо сӱӱген кожоҥдор болуп калды. Андрей Валерьевич јаҥыс ла јайалталу ӱлгерчи, композитор болгоныла аҥыланбай јат, анайда ок ол ус колдорыла кеендик эдимдер чӱмдеп јазайт.

Кӱӱчиниҥ јайаандык ижи 1993 јылда Кан-Оозы аймакта ады-јарлу «Кан-Ойрот» ӧмӧликте башталган. Ӧмӧликтиҥ баштапкы кӱӱлик јуунтызында угулган Андрей Валерьевичтиҥ кожоҥдоры албатыга јарлу боло берген. Ээчиде кӱӱлик јуунтылары 2005, 2007, 2016 јылдарда јарыкка чыккан. Кӧп лӧ саба ӱлгерлерине автор кӱӱзин бойы чӱмдейт.

2005 јылда Оҥдойдыҥ культура бӧлӱгинде «Кайа» деп ӧмӧлик тӧзӧлгӧн. Оныҥ башкарачызы болуп Андрей Хабаров кӧстӧлгӧн. Андрей Валерьевич кожоҥныҥ сӧстӧрин чӱмдееринде эрчимдӱ иштенет, оныҥ ӱлгерлери јараш кожоҥдор болуп, эл-јонныҥ јӱрегине шиҥип калды. «Кайа» ӧмӧликтиҥ ле Андрей Хабаровтыҥ таҥынаҥ кожоҥдорыныҥ сӱӱчилери јаан да, јаш та ӱйениҥ улузыныҥ ортозында јеткил. Кӧп чӱмдемел-кожоҥдорды интернеттеҥ де угар арга бар.

Јайаандык эҥирге амадап келген улус кӧп јаҥы кожоҥдорло таныштылар. Бир канча кожоҥ солун-јараш клиптер ажыра кӧргӱзилген, анайда ок хореографиялык композициялар кӧргӱзилди. Јаҥы кӱӱлик дисктиҥ презентациязы кӧрӧӧчилерге јилбилӱ болды.

Бойыныҥ најызыныҥ јайаандык эҥирине Алтай Республиканыҥ нерелӱ артисттери Нина Колондина, Марина Саксаева, Влад Санашев, «Ар-Башкуш» ӧмӧликтиҥ кожоҥчызы Сергей Саксаев, телекейлик фестивальдардыҥ ла конкурстардыҥ лауреады Айдар Чурупов амадап келдилер. «Кан-Ойрот» ӧмӧликте кожо иштеп, јайаандык јӱрӱмде ӧмӧ-јӧмӧ алтамдарды эткен Руслан Шагаев кӧрӧӧчилерге бир канча Андрей Хабаровтыҥ кожоҥдорын кожоҥдоды.

Эҥир-туштажу тӱгенер алдында Андрей Валерьевич культураныҥ байзыҥыныҥ јаан кыбына толо јуулган кӧрӧӧчилерге ле эҥирди ӧткӱрерге јаан јӧмӧлтӧзин јетирген улуска јаан быйанын айтты.

Т. Егорова

Источник: Районная газета «Ажуда»