АҤЧЫ САМТАЕВ: ОҤДОЙ АЙМАКТА ГРЕК-РИМ КӰРЕШКЕ ЈАҤЫ «ТЕБӰ» БЕРЕР АМАДУ БАР

Бу кӱндерде бис Алтайыстыҥ атту-чуулу кӱрешчизи, грек-рим кӱрешле СССР-дыҥ ла Европаныҥ чемпионы, телекейдиҥ ле СССР-дыҥ албатыларыныҥ Спартакиадазыныҥ јеҥӱчили, Алтай Республиканыҥ грек-рим кӱрештиҥ федерациязыныҥ јааны Аҥчы Самтаевле јолыгып, кыскачак куучын ӧткӱрдибис.

— Аҥчы Адучинович, слердиҥ Оҥдой аймакла јорыгардыҥ тӧс амадузы неле колбулу?

— Спортло, кӱрешле колбулу. Грек-рим кӱрешле таскадаачы Сергей Анатольевич Термишевле кожо јурттарла јорыктап, кӱрештиҥ айалгазын ширтейдибис. Аймактыҥ јааны Мирон Георгиевич Бабаевке јолыктыбыс. Јӧптӧжӱ тургузып, мынаҥ ары ӧмӧ-јӧмӧ иштенип, слердиҥ аймакта грек-рим кӱрешке јаҥы «тебӱ» берер амаду бар. Оноҥ улам спортчыларла, депутаттарла јолыгып, текши айалганы куучындажадыбыс. Бу ла отурган Михаил Макарович Тебековтыҥ ишмекчил кыбында куучын база ла ол ло керегинде…

— Оҥдойдо грек-рим кӱрештиҥ эмдиги айалгазы кандый деп кӧрӱлет?

— Јарамыкту деп кӧрӧдим – кӱрешчилер бар, таскадаачылар бар. Бу ла Аргымак Эрелдеевич Ечешев, Сергей Термишев, Аткыр Бордомолов, Айсанат Екчебеев, Мерген Мендешев – ончозы ченемелдӱ таскадаачылар. Бу ла јуукта јаан маргаандарда Куладынаҥ Батыр Ечешев ле Ийиннеҥ Кумдус Васильев јеҥӱчилдердиҥ тоозына кирдилер. Айдарда, јакшынак турулталар база бар. Уур-кӱчтер јаҥыс ла спортзалдар јанынаҥ деп сананадым: Ийинде спортзал јок, Оҥдойдо ХСУ деп залда јаан јазалду иштер керек эмтир.

— Јуук ӧйгӧ кандый амадулар тургузадыгар?

— Јаан удатпай Москвага барала, Россияныҥ грек-рим кӱрешле федерациязыныҥ јааны Михаил Мамиашвилиге јолыгып, мынаҥ ары тергеебисте бу кӱрештиҥ ӧзӱми керегинде куучындажып, оноҥ ары иштенерге јӧптӧжӧр амаду тургузадым.

— Оҥдой аймактыҥ эл-јонына кандый кӱӱнземел айдар арга бар?

— Мениҥ чыдаган јерим Оҥдой аймак ине, Караколдыҥ орто ӱредӱлӱ школына ӱренип, Константин Александрович Таркрашевте таскадынып, јаан кӱрешке јолды мында баштагам деп айтсам, јастыра болбос. Оныҥ учун Оҥдойдыҥ улузы меге јерлештер болор… Келиже берерде, база бир айдарга турганым: бу айдыҥ 18-чи кӱнинде ӧдӧтӧн бистиҥ Президенттиҥ талдаштарына келип, эрчимдӱ турушсын деп, Оҥдой аймактыҥ эл-јонына баштанып турум.

Бу јастыҥ байрамыныҥ алдында энелерди, эјелерди, сыйындарды, ончо эпши улусты уткып турум. Јаан ырыс, су-кадык ла талдама деген јӱрӱм кӱӱнзейдим!

А. Атаров куучындашкан

Источник: Районная газета «Ажуда»

#спорт #Онгудай #Онгудайскийрайон #герой